Իշխանությունը հայտնվել է նոր փուլում եւ նոր մարտահրավերի առջեւ. քաղաքական մեկնաբան Հակոբ Բադալյան
Հայաստանի արդի քաղաքական կյանքը՝ ընտրություններից առաջ եւ հետո: Ինչպիսի՞նն է այն: Քաղաքական մեկնաբան Հակոբ Բադալյանի գնահատմամբ՝ քաղաքական դաշտն առաձնապես չի փոխվել, անուններ են փոխվել, եւ դաշտը հայտնվել է միջանկյալ մի ժամանակահատվածում: «Իշխանությունը հայտնվել է նոր փուլում եւ նոր մարտահրավերի առջեւ՝ ինչպե՞ս բյուրեղացնել այն առերեւույթ երկբեւեռ համակարգը, որը ձեւավորվել է անցնող 10-ամյակի ընթացքում, որը կարողացավ հասնել «անաղմուկ» ընտրության տեխնոլոգիայի, բայց որին, իհարկե, պետք է նոր փուլ, նոր «որակ» այդ ամենին գաղափարական տեսք տալու համար»,-նշում է բանախոսը:
Ինչ վերաբերում է ընդդիմադիր դաշտին, ապա քաղաքական մեկնաբանի բնորոշմամբ՝ այն չգտավ իր ռազմավարությունը՝ նոր իրավիճակում, իշխանության նոր դեմքի պարագայում: «Եւ ապրիլի 2-ն ընդամենն արձանագրեց, որ ընդդիմության դաշտում ճգնաժամը դեռ շարունակվում է եւ ոնց որ երկար կշարունակվի»,-կարծում է նա:
Վերոնշյալ խնդրի պատճառներից մեկը Հակոբ Բադալյանը համարում է ընդդիմության՝ իշխանության քայլերի հանդեպ խոցելի լինելը: «Իշխանությունն ունի ահռելի ռեսուրսներ, իշխանությունը կամայական կերպով է մեկնաբանում օրենքը, իշխանությունն իր ձեռքում է պահում դատարանները, իրավապահ համակարգը, այսինքն՝ այս առումով, իշխանությունը մահակը ձեռքին է»,-շեշտում է նա:
Իշխանության գրագե՞տ, թե՞ ընդդիմության անգրագետ գործելաոճի արդյունք: Ո՞րն է խնդիրը: Այս եւ շատ այլ հարցերի պատասխանները՝ «Հարց իշխանավորին» հաղորդման շրջանակում:
